I cazadore in festa par 105 ane de ra riserva de Anpezo

da “La Usc di Ladins ” del 12 Maggio 2025

Ra storia, ra tradizion e ra atualità de śì a ra caza, con chera de lourà par el paes, par ra besties e ra natura

I sozie de ra riserva de ra caza de Anpezo i à fato festa par i so zento e zinche ane de storia, da canche r’é nasciuda, co ra zena par ra fin de ra stajon de ra caza. L ea un grun de parsones, pi de zento, su da i laghe Ghedina, agnò che i cazadore i à anche betù fora i trofee, el di de ra so festa. Bruno Menardi ‘l é el presidente de ra riserva de ra caza in Anpezo: «Gramarzé ben a duta ra parsones vegnudes ca stasera, par chesta festa, che ra deenta senpre pi granda e bela, par duto el paes de Anpezo, no solo par ra nostra riserva. Anche sto an on abù ‘na bela stajon de ra caza; on podù fei vede cemodo che louron, par precurà ra besties selvateghes e ra natura, cemodo che me disc anche ra istituzios che on ca con nos. Ra colaborazion con Rejon, Provinzia e Comun r’é senpre forte e con chesto śon adora a śì inaante su chesta strada».

Par ra Rejon Veneto ‘1 ea Silvia Cestaro; par ra Provinzia de Belun ra vize presidente Silvia Calligaro; par el Comun de Anpezo el loudaduò Giorgio Da Rin; par el DistrettoValboite de ra caza el presidente Paolo Zanetti; par ra asociazion de ra caza Uncza ‘l ea Sandro Flaim e Mauro Bortolotti, con Martina Da Rin e Sebastiano Rui de ra sezion Uncza Dolomites de Belun, nasciuda da poco; ‘l ea Michele Da Pozzo diretor de el Parco de ra Dolomites d’Anpezo; Oscar Da Rold e Roger De Menech, comandante e vize de i poliziote de ra Provinzia; Elsa Zardini e Denni Dorigo, par ra Union de i Ladis d’Anpezo e ‘l Istitut ladin Cesa de Jan; Fausto Menardi de ra Schiitzenkompanie Anpezo Hayden.

El loudadué Da Rin e ra vizepresidente Calligaro i a dito che ra istituzios ‘s a da loura aduna con chi de ra caza, parcé che i cazadore i é i prime a sta de sguaita, su ra tera agné che i vive, e i fesc un grun de laoro par precura ra natura, su par ra nostra crodes. Ra consiliera rejonal Cestaro r’à parla polito del laoro fato da ra riserva de ra caza de Anpezo, a Socus, agnó che se pé loura ra besties, poco dapo che ‘s é ciapades. R’à dito che sarae da ruà a bete a śí un marchio, anche par podé bete sul merca ra carne de i selvateghe ciapade e lourade de inze de chesta riserva. El presidente Zanetti ‘l à dito algo de ra noa sezion Unzca, che ‘I é nasciù inze ra Dolomites de Belun, e de el bon laoro che ‘s é drio a fei ra riserves, anche chera de Anpezo, par precura ra besties.

Cemodo che se sore, intra cazadore, chera sera i 4 premia i trofee pi biei de ra stajon. Par el zervo: Claudio Michielli, Simone Cordella, Fabrizio Soraru. Par el capriol Eric Sottsass, Nicola

Tormen, Paolo Zandomenego. Ciamorza femena: Matteo Apollonio, Francesco Zanotto, Antonio Santer. Par ra ciamorza Giuseppe Stefanelli, Pietro De Col.